新片煞科霆鋒敬酒滿場飛學友𢱑加戲止癮

歌神張學友與謝霆鋒近日現身電影煞科宴，霆鋒興奮逐枱敬酒。而久未拍戲的學友成為人氣王，被眾人爭相集郵，他笑言下次要向老闆申請有更多戲份再過戲癮，女星劉雅瑟亦表示未能跟歌神有更多對手戲，留下遺憾。

由張學友、謝霆鋒、劉雅瑟及吳鎮宇等主演的英皇電影《海關戰線》近日舉行煞科宴，電影的3張先導海報亦同時曝光。久未接戲的學友難得出山，席上大受歡迎，不少工作人員都抓緊機會合照，學友亦有求必應，他表示今次拍攝過程愉快：「太耐冇拍戲，見到認識嘅工作人員，大家都有工開，喺片場傾吓講吓，拍得好開心！」之前他與霆鋒只在《全城熱戀熱辣辣》合作過一場戲，跟吳鎮宇更是從未合作過，學友打趣說：「希望以後大家再有機會碰頭，我會同楊老闆（楊受成）講，下次畀多啲戲份我。」

劉雅瑟出「戰」留憾

至於身兼男主角及動作指導的霆鋒就偕導演、監製及編劇逐枱敬酒答謝劇組，霆鋒稱今次拍攝過足癮：「實際拍咗60幾組，但籌備工夫花咗唔少時間，總計都有80組！」講到煞科心情，他感性表示：「好似我呢種喺片場長大嘅人，最唔捨得當然係片場入面嘅人！」而劉雅瑟首次參演大型動作片，她坦言心情緊張：「係好驚心動魄嘅一次體驗，冇諗過呢啲爆炸場面都係真實拍攝！但好遺憾冇得同學友有更多對手戲，期待之後仲有機會演呢類型電影，希望下次有多啲動作戲！」

另外，英皇集團主席楊受成在煞科宴上感謝台前幕後的演員及工作人員通力合作，才可以在疫情下排除萬難拍出這部佳作。他又指多得香港海關的全力配合，借出昂船洲海關基地、北角海關總部及不少船隻，令整部電影充滿真實感。