與江嘉敏同病相憐陳曉華扮大肚出事腳傷惡化

藝人何廣沛、江嘉敏及陳曉華等昨午於電視城出席主演劇集《食腦喪B》宣傳活動，曉華一拐一拐進場，嘉敏則坐着輪椅現身，可謂同病相憐！原來2人不約而同忙於拍攝劇集《回歸》、《曙光》，也是扮演孕婦，嘉敏說：「可能郁動得多，所以情況仲嚴重咗，最慘係屋企電梯維修咗個幾星期，管理處已盡量幫我催緊。劇集拍攝暫時繼續以輕鬆戲為主，視乎我傷患進度，睇吓需唔需要改劇本。」

至於曉華本已有傷的右腳則無法屈曲：「不過可以訓練到我慢慢行，性格唔好咁急，要平復心境。我諗可能個假肚負荷太重，都會影響腳傷。」

何廣沛被問到劇內為雪妮慶祝70大壽，結果玩掟蛋糕，搞到對方「一臉都係」，他笑答：「我邊有咁大膽？雪妮姐好玩得，佢覺得點解自己係生日派對主人翁，但玩就冇份？佢主動加入，完全冇嬲。」

何廣沛粉絲追捧

至於他與江嘉敏已上演吻戲，何廣沛笑說：「又唔係第一次，嚟緊我哋都仲會有幾場嘅。（收視高過《金宵大廈2》！）呢啲嘢唔係我哋可以控制。呢套劇舊年喺平台播過，好多死忠粉絲都已經睇晒，大家嘅反應好多都話『好睇過預期』。」