拍戲歎勻18個男友！ 林明禎打破假象 自爆冇人追

鄧麗欣、林明禎、王菀之等前晚在鑽石山為賀歲片《飯戲攻心》拍攝「彩蛋」戲份，身為「馬來西亞女神」的林明禎在戲中共有18個男朋友，ANSONBEAN、吳肇軒與Locker正是其中3位裙下之臣，她認為3人分別代表Sexy、可愛與男子漢的類型。戲中男友多多，現實就耍手擰頭，她笑說：「唔想咁多，因為會好忙。現實中冇人追我，因為人人都以為我好多人追。」問到3男如何奪取女神芳心？Locker笑謂會帶她去吃最愛的咖喱魚蛋；吳肇軒則會帶女神去屯門睇樓，方便她置業。

鄧麗欣與台灣男星王子（邱勝翊）分手半年，近日男方傳出與台灣女神郭雪芙撻着，她說：「有留意新聞，總之係真又祝福，唔係真亦都會祝福。（八卦問吓王子？）我唔會去八卦啦！（你信唔信係真？）冇話信唔信，等佢自己講，大家就知道真相。（新年搵番個伴？）冇特別去諗，淨係希望疫情快啲過去，可以去旅行。」而王菀之笑謂「加餸」戲場面熱鬧得像拍第二套戲，姜皓文則稱最喜歡拍攝賀歲片，每年也希望參與，志在攞個好意頭。