黎耀祥讓獎畀張振朗 馬國明爭視帝：好難打贏拳王！

無綫《萬千星輝頒獎典禮2021》將於下月2日隆重舉行，昨日無綫電視總經理（節目內容營運）曾志偉公布多個獎項10強名單，當中包括「最佳男、女主角」、「最佳男、女配」、「最佳劇集」等獎項。今年戰況最激烈的是視帝之爭，最強陣容包括《拳王》的黎耀祥、張振朗、《星空下的仁醫》的鄭嘉穎、馬國明、《逆天奇案》的陳展鵬及《換命真相》的譚俊彥等。而視后方面有《七公主》的林夏薇、高海寧、《把關者們》的黃智雯、王敏奕，以及《星空下的仁醫》鍾嘉欣等。曾志偉透露今次台慶頒獎禮形式希望類似金像獎般，更有意邀請近日翻唱《倒轉地球》Hit爆的陶大宇出席。而他宣讀視后10強時，口快快將新抱「王敏奕」的名字讀成「王奕敏」，問會否投新抱一票？他笑說：「唔會私心，我太多心水。」

馬國明受訪時說到要跟「大佬」嘉穎爭獎，他表示獎項是隨緣，問會否夠兩大「拳王」打？他即笑說：「係喎！照計醫生真係好難打贏拳王㗎喎！」至於鍾嘉欣於《星》劇的精湛演技被網民激推為視后大熱，她說：「好開心，獎項都係隨緣啦！今次我返嚟最主要係處理屋企事，搞掂我就會離開香港，希望大家支持《星》劇各項提名。」

「3屆視帝」黎耀祥被問到會否「讓獎」給振朗時，他謙稱：「我邊有資格讓獎畀人呀！不過如果你問我，我梗係想個獎畀振朗啦！因為睇到佢付出好多。」而有份提名視后的高海寧亦力撐振朗：「呢個角色對佢嚟講都係一個突破，身形操到好Fit仲有好多內心戲，知道佢付出好多。」至於振朗坦言平常心面對，更直指《星》劇兩大視帝級馬國明及鄭嘉穎很厲害，就連該劇的鍾嘉欣亦是其心目中視后之選：「不過我真係要多謝祥哥，佢除咗分享咗好多演戲心得畀我之外，仲咁支持我，我真係好愛佢，能夠喺佢哋口中聽到自己個名，我已經賺咗，已經好滿足。」他又指自己有私心，會Tip另一勁敵譚俊彥。