綵排台慶搵命博 陳展鵬瞞老婆 疊羅漢失重心

《萬千星輝賀台慶2021》將於本月19日舉行，藝人連日來進行綵排，昨日輪到李克勤、陳展鵬、草蜢、鄭俊弘等為不同項目練習，場面熱鬧。

展鵬率領馬貫東、張彥博、黃建東等綵排疊羅漢，被幾位新進演員托起，怎料連環失重心險墮地，非常牙煙！事後他表示該表演全是「力的表現」：「頭先只係舉到胸口，正式演出要舉過頭，依家未知邊個負責托我，睇吓邊個頂唔順就換人。（有冇畏高？）都OK，但真係有離心，要配合力度，所以磅數唔再肥就OK，手臂要粗啲。（太太單文柔緊張？）都會，所以我冇講細節畀佢聽，今次算係我咁耐以嚟最難嘅表演，始終都危險，所以要練力同互相信任。」

剛從杭州返港2星期的克勤，台慶夜將獨挑大樑獻唱金曲，他透露離港4個月，返港後因飯局不斷而胖了3、4磅，由於今個月是太太盧淑儀生日，而他則下月生日，相信仍會食唔停。談及今次內地之行收穫豐富，問是否豬籠入水，他笑說：「我唔計呢啲，做咗一季《中國好聲音2021》導師好有挑戰性。（賺錢畀老婆買樓？）我唔計呢啲，都係為小朋友將來着想。（之後繼續去內地？ ）如果唔係要返嚟，一路喺內地都有工作，但我有屋企人，唔想兩個仔唔認得我，所以每年去一次幾個月。」

至於已多年沒擔任台慶表演嘉賓的組合草蜢，成員蔡一傑早前生蛇，幸康復進度理想，只是頸部不時疼痛，但不影響跳舞。