DmC:Devil May Cry天使惡魔一體通殺

唔係好多廠商夠膽將經典遊戲作出大改變，而月中推出嘅《DmC: Devil May Cry》卻由內到外大翻新，連主角但丁嘅出生同容貌都唔同晒，變成天使惡魔混血兒，可運用天使或惡魔武器打低指定屬性敵人，玩落有挑戰性過上代打到敵人飛起再駁招，新鮮感滿Fun。

新但丁似古惑仔

《DmC: Devil May Cry》新版但丁唔再留長白髮懶Chok，而係變成短黑髮加汗衣，遠睇幾似謙謙版「古惑仔」，好在有件長袍頂住，總算保留番少少原版但丁神髓。因劇情需要，新角亦唔再標榜係人類同惡魔混血兒；反而變成天使與惡魔混種的「涅法雷姆」人。敵人亦唔會單純係惡魔，而係識得耍手段、玩弄政治去操控人類嘅高智慧種族。不過唔理係惡魔抑或高智慧種族，出場都預咗畀但丁打到九彩！

轉換武器打敵人

天使惡魔混血兒設定，令具備天使同惡魔屬性嘅武器順理成章地出現。當打打吓發覺有啲敵人打極都唔傷，便要轉唔同屬性武器應付。要分辨天使或惡魔屬性並唔難，敵人透出的光芒已說明一切，散發青白色光芒嘅應轉去天使模式攻擊，武器種類以輕盈快速為主；如果敵人發出紅光，則要用重型惡魔武器攻擊。好似早前試玩版中，新但丁已可使用速度快、連招多嘅天使鐮刀Osiris，以及較笨重但攻擊力強嘅惡魔大斧Arbiter。

駁招拎SSS級評價

其實新作都保留部分原著神髓，好似華麗動作、超多連招以至評分系統等，都加入《DmC: Devil May Cry》內，大家可盡情諗計駁招打低眾多敵人，將評價提升至最高SSS級。另可使用原作嘅「惡魔扳機」功能，同時按下左右Analog掣，便會將身邊敵人彈到半空，可趁機盡情出招。此外，新作都係要靠打低敵人收集嘅白色寶珠來買技能，前作買完冇得回收，但到今集就可退回技能贖番寶珠。不過講到底，小記比較失望係依然未有連線功能。

Details

類型：動作

開發：Capcom、Ninja Theory

平台：PS3、Xbox 360

推出日期：1月17日

售價：約$328

查詢電話：2366 1001

撰文：布偉倫

第一手消息請下載on.cc東網 iPhone/ iPad/ Android/