作客深水埗撳住嚟砌 理文派4蛋重奪榜首

深水埗新箭頭朱偉鈞今場上演「地標戰」，兩位韓援沈云燮及權宰憼齊齊披甲，門將奧利斯傷愈復出擔正，與西班牙中堅捷西斯負責防守重任；理文則由基華尼頓、艾華頓及張憙延組成進攻三叉戟，黃威復任正選坐鎮中場，防線由戴起隊長臂章的荷西安祖領軍。

上半場理文佔盡主動權，6分鐘，基華尼頓接應傳中倒掛二傳，黃威門前加多腳抽高。17分鐘，張憙延與立花稜也禁區內撞牆配合，前者窄角度起腳射近柱，被奧力斯擋走。深水埗圖靠死球攻勢發圍，但未能威脅陳嘉豪。理文攻勢不斷，27分鐘，鄭兆均遠射未能轉化成入球。3分鐘後，艾華頓單刀赴會，奧利斯及時出迎化解危機。37分鐘，久攻不下的理文終打破缺口，立花稜也後上助攻，與黃威一次撞牆配合作後，前者窄角度射破奧利斯十指關，理文先開紀錄。補時階段，基華尼頓把握單刀機會勁射得手，理文手握兩球優勢返更衣室。

易邊再戰，深水埗變陣派鄧子均落場，47分鐘，沈云燮罰球直射僅柱邊出界。54分鐘理文再下一城，余煒廉傳中，張憙延門前接應射成3比0。理文領先後亦作出調動，由顏樂楓、李康廉及亞哥斯達入替。落後的深水埗比賽後段搶回不少控球權，但具威脅埋門欠奉，反觀理文打反擊更煞食，89分鐘終由艾華頓「埋齋」，以4比0擊敗主隊，重奪榜首之位。

理文上半場尾段才出現首個入球，賽後主教練陳曉明承認有改善空間，但就對賽果「收貨」：「對住實力相對弱啲嘅球隊，往往入第一球係最重要，因為對手都想咬住唔失波，當你入到第一球，壓力就會減低，信心都增強。今日整體都製造到好多機會，4比0冇人會話唔滿意，當然把握力都要改善，但最重要係拎晒3分。」