要聞港聞

簡化程序要創新 咪留土地嚟養蚊

香港人普遍概念係本港土地供應不足,港府搵唔到地起樓,搞咩康樂文娛、社區服務之類要用地,梗係擺埋一邊等吓先。之但係發展局局長黃偉綸尋日喺網誌中,完全顛覆咗呢個概念;原來港府現時有唔少閒置土地可用,但喺過去3年內,只有30幾宗團體申請租用獲批。喂!雖則香港寸金尺土㗎啫,都唔係有地唔用,留嚟養蚊,搞到港人出街散心都要畀蚊針,咪盞令民怨徒增。
嗱,為咗善用土地資源,地政總署將一啲暫時未有長遠發展計劃嘅土地,例如偏遠農地、天橋底之類,透過「短期租用」方式,租畀非政府機構或社會企業,用作社區、團體或非牟利用途,查實整個構想係非常美好。既然未落實發展用途,畀一啲團體租用嚟發展社區服務,不但可以收取租金,仲可以造福百姓、惠及社群,總好過閒置喺度荒廢生草,唔單止影響市容,更容易吸引流浪漢聚居,或畀人拎嚟堆積垃圾,產生治安、衞生等問題。
不過,「講就天下無敵,做就有心無力」係港府慣常作風,無論構思點樣天花龍鳳,實行唔到都係多餘。地政總署高級產業測量師劉志堅提到,過往3年只有120多幅土地接獲團體申請,但地政總署嘅「地理資訊地圖」網頁顯示,現時本港係有707項空置政府用地噃。咁少團體申請,原因又何解呢?
撇開地理環境等外在因素,議員陳恒鑌指出,係因為申請手續繁複,更形容「幅地擺出嚟兩三年,但審批程序都兩三年」。唉,市民都畀政府搞到唔識分短期、中期同長期嘅分別囉。就算地政總署舊年增訂指引,訂明喺申請當日起計,不超過12個月內完成處理程序;哇,都要等足1年,團體獲批後仲可以用幾耐呢?
除咗審批需時,門檻高都係令人望而卻步嘅原因之一。過去3年嘅申請只有四分一獲批,令人懷疑港府到底有冇心出租土地。劉志堅解釋話要考慮用途、申請人營辦能力等,聽落好似合理,但唔符合實際情況囉。假如話港府缺乏空置用地,申請人多到爭崩頭,咁收緊資格、加強審查確係有必要,之但係寧願養蚊,都唔准一啲港府眼中「缺乏營辦能力」嘅小機構申請,實在講唔過去囉。
綜觀歷史,因循守舊係朝代衰落嘅通病。港府喺土地政策上缺乏創新,未做到因時制宜,先會有缺乏土地嘅錯覺。土地長遠規劃的確要深思熟慮,之但係喺短期租用上,當局可以更加大膽,將審批程序簡化,容許更多機構租地進行新嘅嘗試。例如議員建議將計劃轉交地區專員管理,查實不失為好辦法,而唔係繼續得過且過,有地唔用,擺喺度又可以獲得啲乜呢?
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500