要聞港聞

挑戰國安唔收手 齊齊踎監來敍舊

天堂有路你不走,地獄無門闖進來,《港區國安法》去年6月底生效,法例本身不設追溯期,所以其實只要班牛鬼蛇神肯收手,都未必奈得佢哋何,你看李漢奸幾識得玩法律罅,知道呢鋪殺無赦,立即收口,甚至轉軚支持23條立法,同「港獨」割席,打倒昨日嘅自己,面不改容,仲有民主阿婆陳方安生又係收晒佢皺皮,匿埋做隱居阿婆,呢啲咪叫老奸巨猾,「奸」就係漢奸個「奸」囉!
反而班後生就唔識死,青春少艾大把前途,但就不斷踩紅線挑戰國安,就好似南區前區議員袁嘉蔚,廿幾歲女跟住班反對派搵食,涉及民主派初選違反國安法被捕,隨時囚終身,在押期間竟然仲夠膽玩嘢,羅湖懲教所前排接獲情報,知道有個別在囚者企圖建立對抗勢力,聯絡其他還押者集體鬧事,署方突擊搜查,發現6個在囚者藏有違禁品,袁嘉蔚都有份,梗係要紀律檢控啦,點知有18同黨集體威脅署方放生佢哋,要勞動「黑豹」出動,懲教署署長胡英明親自到場督師平亂。
呢個世代,唔單止後生可畏,女人搞起事上來,可能比麻甩佬更惡,嗱,就好似老牌反中亂港組織支聯會,本來老傢伙拉嘅拉,走嘅走,正副主席李卓人同何俊仁都係踎監,諗住收硬檔,點知殺出個副主席鄒幸彤,三十零歲做緊大律師,好做唔做,竟然撐住呢個殭屍檔口,以身試法,同警方對着幹。警方國安處上月底發信畀支聯會7名常委,要求他們在呢個星期二前提交所要求資料及證明文件,鄒幸彤帶隊到灣仔警察總部回覆警方,表明拒絕提供資料。正如保安局所講,有關團體無視警告,一意孤行,堅決拒絕配合警方依法根據《實施細則》附表5提交資料嘅要求,機會畀晒你哋唔珍惜,警方國安處人員尋日迅速行動,拉咗包括鄒幸彤等4名支聯會骨幹,連死剩種都拉埋,支聯會真係唔收檔唔得啦!
「無自由,失自由,傷心痛心眼淚流」,九十後未聽過呢首《鐵窗紅淚》,唔知道自由可貴,反而信埋晒「坐監令人生更精彩」,依家唔慌唔精彩囉,老嘅嫩嘅,男男女女,齊齊入冊,在監獄新知舊雨喜相逢,可以齊齊開P都得,漢奸黎不愁寂寞啦,羅湖懲教所咁多囡囡就冇佢份,赤柱就肯定老友陸續有來,聽講佢卜定個屎坑位畀佢嘅黑道之交「上海仔」喎,大家到時齊齊洗屎坑,臭味相投,唱吓監獄風雲《友誼之光》,嗱,說有萬里山,都隔阻唔到兩地緣,友誼是改不了,兩條粉皮都係注定赤柱重逢㗎喇!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500