要聞港聞

政情:泛民鬼喊捉鬼 3票倒戈 讓位建制

元朗區議會尋日補選副主席,3個泛民議員投棄權及無效選票。 元朗區議會尋日補選副主席,3個泛民議員投棄權及無效選票。
元朗區議會尋日補選副主席,3個泛民議員投棄權及無效選票。
元朗區會補選副主席 輸得難睇
元朗區議會尋日補選因民主派麥業成辭職而懸空嘅副主席職位,泛民主派竟然有3人投棄權及無效選票,最終令身兼錦田鄉事委員會主席、鄉事派當然議員鄧賀年擊敗泛民嘅陳詩雅當選。其實,本身泛民為咗各自嘅利益,經常鬼打鬼,而發生今次疑似倒戈事件後,泛民陣營亦大為震動,隨即展開「捉鬼」行動,要抽出邊3個泛民區議員係「鬼」,有前議員更喺社交平台貼文,直斥今次根本係泛民叛變,仲話恥與為伴。
鄧賀年攞足票 贏陳詩雅
政府要求區議員宣誓,而喺上個月傳出「加辣」方案,即係要追埋薪津同營運開支高達百萬元後,隨即引發辭職潮,逾200名泛民議員辭職。原本元朗區議會有45席,但經歷辭職潮後,只係剩低24人,建制派同泛民各佔12席,可謂打成平手。
24名區議員尋日都有出席會議,聲稱係政治素人嘅陳詩雅獲泛民嘅張智陽提名,由張秀賢同伍軒宏和議,鄉事派就由文富穩提名鄧賀年參選,由程振明同鄧勵東和議,投票後結果顯示,鄧賀年取得12票,陳詩雅只有9票,3票棄權及無效,其中一票更剔咗喺第3格。
明明建制派同泛民主派各有12票,兩個參選人都攞足票嘅話,最後要抽籤都可以話博一鋪、睇彩數,然而鄧賀年係攞足票,明顯係泛民主派走票,導致陳詩雅敗北。陳詩雅對傳媒話尊重結果,又話自己年資尚淺,可能經驗唔夠,明白有其他議員或會傾向投選較資深嘅鄧賀年,甚至投下無效選票。
究竟泛民邊3個區議員投棄權票?熱血公民王頴思回應傳媒查詢其投票取向時,淨係話唔方便講。
夠打都「投降」 恥與為伴
點會有人自認係「鬼」,而呢件事令到泛民陣營好震驚。有前區議員形容事件係崩壞,另一前區議員林進更喺社交平台貼文,直指泛民有人「叛變」,泛民明明夠打而「投降」,佢要求嗰啲投咗棄權票嘅區議員向公眾解釋自己嘅投票意向,尤其係作為民選議員,喺呢件事上絕不可能蒙混過關,仲希望公眾畀壓力佢哋,否則佢寧願以後只得9位民主派議員,都唔想與狼為伴喎。
鄧賀年就話唔知點解泛民冇共識而出現內部矛盾,又話之前都冇聽過泛民之間有不和諧嘅現象,感到詫異。依家當選副主席,佢希望可以推動番包括交通、渠務等地區政策,亦希望建制同泛民喺地區上可以合作,「民生嘢嚟(口架)嘛,講道理咪得」,但就相信雙方喺政治層面上都係冇乜合作空間喇!
鄧賀年鄧賀年
鄧賀年
陳詩雅陳詩雅
陳詩雅
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500