要聞港聞

笑看天下:睇東方避開毒菇陷阱

「多識鳥獸草木之名」,原來不一定要讀《詩經》,睇《東方日報》一樣掂!本報關心時事關心社會,更關心你嘅健康!阿哥,唔單止路邊的野花不要採,路邊或者屋邨的野菇更不要採,否則分分鐘冇命!
本港連日下雨後,無論屋邨花槽、郊野公園甚至行人路邊,均見菇菌處處,雨後春筍就正,雨後多菇菌就危機重重、陷阱處處!過去5年發生至少15宗市民吃野菇後中毒個案,2018年更有人因而死亡。而去年9月,一名5歲男童和47歲女子進食喺公園採摘嘅野菇後,出現惡心、嘔吐、腹瀉等徵狀,要送院治理,幸無大礙,之但係一次意外足以致命,並非次次咁好彩。
本報記者日前巡視多區公共屋邨均見菇蹤,當中將軍澳翠林邨有多達30株野菇遍布山邊,既然曾有市民誤吃野菇中毒,有關屋邨理應張貼告示提醒居民咪亂採摘來吃,以免中毒,可惜記者見唔到有任何告示。記者從各區收集咗7款野菇樣本交予專家檢驗,證實當中5款屬毒菇,包括全世界導致最多人中毒嘅「綠褶菇」,近看或觸摸亦可致中毒,從圖片可見其體形龐大,高過一部手機,菇樣可愛,呃得吓人!
此外,記者又喺將軍澳發現一種體形細小嘅野菇「小皮傘」,外形酷似迷幻蘑菇。真嘅迷幻蘑菇含有裸蓋菇鹼和脫磷酸裸蓋菇素等迷幻物質,吃後有迷幻或興奮嘅感覺,惟此類迷幻蘑菇已被香港納入《危險藥物條例》管制範圍!總之,郊野、屋邨、路邊之野菇不要採,漁護署、房屋署宜多張貼告示,家有傭工嘅讀者,更宜把本報圖文並茂嘅毒菇頭版指示之,切勿貪免費採摘返去整味蘑菇炒雞柳,咁就認真磨碌賴嘢啦!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500