東呼即應：食店餐牌與收費有異 網民熱議

近日有網友在網上食店關注組發貼文指，出街食牛腩雲吞米粉及水餃麵時，懷疑被食店濫收款項。據該食店餐牌顯示，湯麵類，點選鳳城水餃麵盛惠37元，雲吞麵同價；牛腩麵則43元，至於任何雙拼則需額外加10元，以價高者計算。但單據卻顯示，牛腩雲吞米粉被索價54元，於是向店舖反映，但只遭店員一句「機打，冇錯」便離去，令當事人不禁慨嘆，「點解唔可以好好地咁做生意」。

有網民指，根據食店餐牌，「點計都計唔到碗牛腩雲吞米搞乜會收佢54蚊」；有人則質疑事主「係咪加咗勁多腩汁定葱，人哋酌量收番一蚊咋？」；有人則不知是否技癢想扮「福爾摩斯先生」，特意將重點放在餐牌上雲吞或水餃撈麵一律44元一項，隨即被其他網民反問，「你邊隻眼睇到呢兩碗係撈麵？」《東呼即應》認為，餐牌價錢與單據有出入，正確做法是找出錯誤原因，系統輸入價錢時已出錯，而不是「望住湯麵就話係撈麵」，替收錯錢行為合理化。