政情：容海恩千金 氹得葉劉好開心

雖然袁昌蔚今年只有4歲，然而乖巧伶俐，葉劉話佢一見到鏡頭，就會擺出多款生鬼「甫士」，大合照時更會主動走埋去「C位」，即中間或最顯眼嘅位置，儼如主角一樣，當然係惹人注目啦，葉劉指袁昌蔚逗得眾人十分歡喜，話牽住佢嘅小手逛商場亦倍感溫馨咁話。

講起新商場，葉劉話裏面不但有專為中小企服務嘅平台，仲擺設好多本地藝術家創作、或者跟港鐵發展有關嘅藝術品。例如商場露天花園中庭擺放兩隻由港人創作、滲入鐵路元素嘅巨型Teddy Bear；商場4樓擺設嘅藝術作品，就係由一名北京藝術家，利用港鐵以往曾經使用嘅鐵路配件，重新組合成一個港鐵車頭嘅「大型拼圖」，葉劉形容作品別出心裁，相信會深受鐵路迷嘅歡迎。