政情：撐餐飲業出盡力 張宇人係咁食

話說尋日張宇人同幾位副司長去酒樓飲早茶，遍嘗煎釀青椒、蝦餃、春卷等點心，佢哋幾個人掃清枱上食物之後就同酒樓茶客吹吓水，話咁快就去到食晏時段，張宇人就幫襯某快餐集團嘅粟米肉粒飯，而飯後甜品就係酥皮蛋撻；下午茶就光顧另一間快餐店食菠蘿批，仲要打孖上添。

至於晚餐食乜嘢呢？講起上嚟真係「反高潮」，佢話太飽喎！但最終都趣趣地，食咗兩個沙翁。對於飲食業界今次「豁出去」咁提供優惠，佢話大家都食得好開心，至於由此而驟增嘅體重，佢話下個禮拜再話比大家知，點樣搣甩呢幾磅。