政情：水位上升成大患 明日大嶼財務無底潭

林超英質疑，如果填海而得嘅土地，將來會被水淹沒，既唔會解決香港嘅土地問題，反而會製造本來就不存在嘅危險。佢提到，日本關西機場由啟用至今曾發生多次嚴重水浸，即使興建新嘅防水牆依然於事無補，無法擺脫被海水淹沒嘅威脅，擔心香港打算填海起嘅人工島，係完全唔知道將來海水上升後，所引致嘅各種工程需要，港人更可能為此而將金錢投入「無底洞」。

到底未來二、三百年，甚至一千年，海水會上升至乜嘢地步？林超英希望政府能夠正正當當、嚴肅咁樣回答，同埋要清清楚楚咁用數據嚟處理民間嘅擔憂。林超英認為市民即使唔係專家，但若果事情會令到公眾產生憂慮的話，政府係有責任去處理，畢竟人人都係想安居樂業，唔希望將來承受額外嘅風險。