昔日東方政情：打鼓嶺變垃圾黑點 衞生搞唔掂空談發展
喺政府話要建設北部都會區後，唔少團體同部分議員都分批去北區實地考察。其實，區內一啲厭惡性嘅設施，例如堆填區發出惡臭同沙嶺建殯葬城已惹起極大爭議，仲加埋打鼓嶺變咗「棄置天堂」同垃圾黑點，政府連基本衞生都搞唔好，仲講乜嘢發展呢？
話說最近又有議員去打鼓嶺喇！今次係邊個呢？就係議員梁美芬。佢同丈夫及兒子首次到北部都會區沙打兩地實地考察。
梁美芬視察新界東北
梁美芬日前喺社交平台話，身兼打鼓嶺鄉事委員會主席嘅議員陳月明邀請佢哋一齊視察沙嶺同打鼓嶺等地，一行人先後前往沙嶺殯葬城選址、文錦渡口岸、香園圍口岸、荔枝窩等地考察。
梁美芬話香港應好好珍惜，針對規劃中出現嘅不和諧因素，例如要重新審視擴建當區堆填區嘅計劃，認為應發揮口岸優勢，促進港深兩地進一步融合發展。
佢哋仲去咗議員朱國強任校長嘅打鼓嶺全港著名嘅森林小學嶺英公立學校參觀，話該校差啲被殺。不過，梁話此行美中不足之處係作為議員都未能獲批親自到中英街同羅湖橋兩地考察，先知道議員要到中英街視察都係困難重重喇！
當局表示會盡力跟進
陳月明陪完梁美芬考察沙打之後，尋日又去視察打鼓嶺嘅衞生情況，陳月明都有啲勞氣。政府話要大力打擊垃圾黑點，但係黑點掃之不盡，正如打鼓嶺就有好多啲咁嘅地方，陳月明同政府講過好多次，由於政務司副司長負責打擊衞生黑點嘅，佢嘅政助葉紹堅同環境及生態局政助李世隆都跟咗陳月明去打鼓嶺，視察鄉郊黑點清查工作。
鄉郊衞生黑點有幾誇張，見到有啲地方堆積大量垃圾，亦有唔少係棄置嘅建築廢料。陳月明話打鼓嶺地區人口仲不斷增加緊，又鄰近新界東北堆填區，垃圾黑點問題嚴重，唔少缺德但又想節省垃圾傾倒費嘅人士，都會到打鼓嶺傾倒廢料，間接令區內一帶成為「棄置天堂」。而一行人亦睇到較難處理嘅多個頑固垃圾黑點，當局指會盡力跟進，並商討如何根除鄉郊垃圾嘅優化方案。
其實，唔單止係棄置問題，陳月明過往都好關注打鼓嶺堆填區發出惡臭，兼且影響衞生嘅問題，睇嚟相關地區嘅衞生問題仲有排要處理喇！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
