政情：愛的禮物林琳咀老公晒甜蜜梁熙P圖兼騷文筆

大家尋日點過情人節呢？身兼行政會議召集人嘅議員葉劉淑儀，周不時都會影啲靚相「派福利」，而另一名議員梁熙尋日亦有樣學樣，整咗張「小鮮肉配勁筋肉」。大家點睇？係咪冧爆？仲有議員喺網上晒甜蜜照，公然示愛。

梁熙上載嗰張相，係笑容滿臉，上身赤裸，身材健碩，好有肌肉，兼且有腹肌，擺明操得好Fit，手上仲攞住支花添！雖然佢平時都有做運動，但估唔到佢有咁嘅身形喎。跟住佢就自爆身形冇葉劉咁好，唔敢親身上陣，於是借嚟用吓。即係P圖喇！睇嚟都係想博笑吓，吸睛啫！之不過，可能好多人都想知道「真身」係邊個！

「小鮮肉」P圖附上祝福

「小鮮肉」仲寫咗幾句啱聽嘅說話，話「有伴侶嘅甜甜蜜蜜、準時收工唔使被罰、揀到對方心儀禮物。至於暫時單身嘅朋友，其實自己一個都開心。」前嗰幾句都押韻，睇嚟都花咗啲心思。

唔少議會同事見到呢張相嘅反應都唔同，好似容海恩就話「真的太勁要收埋？」管浩鳴就話「你自己真人身材仲好啦！不如post一張寫真！」但鄧家彪覺得P圖嘅身形好正，仲問梁熙可唔可以借圖添！而東區前區議員植潔鈴就唔多滿意，留言「唔好以為P張圖就當交咗貨先得㗎！」仲話要等睇真身。有網友仲話梁熙同葉劉好襯添！

之前都講過，議員林琳前晚同老公喺屋企整泥膠豬豬塔，之後仲咀豬豬。尋日再下一城，佢直情上載同老公咀嘴嘅甜蜜合照。佢喺社交平台解釋點解上載呢張相，因為呢張相係佢哋去法國影婚紗相後，喺餐廳食飯影嘅自拍。佢話隨手一拍，成就咗佢最鍾意嘅相，仲話感恩遇到佢老公，每日都好開心。佢仲有交代豬豬塔嘅最新狀況，亦上載咗張相，已經變咗塌豬豬嘞！

梁子穎貼合照憶初見

愛係要講出嚟嘅，收收埋埋，邊個知啫！好似議員梁子穎咁，尋日亦喺社交平台貼文，仲上載咗張兩公婆對望、含情脈脈嘅相，佢又問「大家還記得在何時何地初見身邊摯愛嗎？」而佢就話當年第一次遇上太太嘅情景，如今仍然歷歷在目，又話兩人將攜手度過四分一個世紀，仲多謝太太一直陪伴同支持添！