要聞港聞

簡約公屋好鬼貴 審議之前有價講

政府推介策略,往往過於粗疏,要言之,即係唔經大腦,求求其其就出台!你話點會唔畀人爛撻撻、唔負責嘅觀感吖?嗱!基層嘅重中之重,冇錯係「房事」問題,政府係想幫助啲居住環境惡劣、尤其屈室求生嘅劏房戶,是以《施政報告》宣布推出「簡約公屋」,畀望穿秋水嘅公屋輪候人士暫住,政府咁有民心,咁希望劏房戶「房事暢通,生活輕鬆」,照計冇理由會有咁多反對聲音㗎!
各位,請聽功夫茶細說從頭,話說簡約公屋未來5年擬建3萬伙,每個單位造價89萬元,有心水清嘅不禁嘩嘩聲,相比一個公屋單位造價約65萬元貴好多喎!若參考房委會最新數字,一個居屋建築成本為76萬元。換言之,簡約公屋都真係愈簡愈貴,比公屋每伙造價貴38%,比居屋高近兩成。咁狠貴嘅簡約公屋,都好唔嗅米氣啫!
好嘞!簡約公屋愈「簡」卻愈「貴」,由是引起社會關注及立法會議員質詢,房屋局局長何永賢其後就話喇,扣除「水、渠」等地盤費用,單位嘅建築成本只係68萬元。喂!都係貴過公屋喎!何局長最新回應又話,建築署正就每個地塊評估,造價有壓縮空間。嘻嘻!乜簡約公屋好似識得縮骨術咁,由最初每伙造價89萬元,下調至68萬元,依家再經過建築署深入研究、評估,未來仲有「壓縮空間」,都真係神奇過美女?模嘅「事業線」,深不可測!大家不妨估吓最後可以「壓」到幾低?
據立法會文件顯示,政府現階段初步確定發展簡約公屋用地4幅,分別位於屯門第3A區近輕鐵青松站、屯門第54區近菁田邨、蓮塘尾近粉嶺高球會及元朗攸壆路。選址全在新界,有議員認為位置偏遠,選址前冇諮詢。簡約公屋未起已被彈位置偏遠交通不便,要大把配套支援例如增設交通接駁、商場等,否則會減低基層入住欲望。
呢嗱!何局長稱覓地不容易,為改善基層住屋必須盡快進行。財政司副司長黃偉綸早前透過傳媒表示,簡約公屋於短期內係增加公營房屋嘅不二之選,有機會下月向立法會提交具體項目及支出進行審議,並會增加市區選址,而房屋局和運輸署正開始討論喺新界偏遠地區提供交通配套服務。
各位,簡約公屋甫推出時,由於單位成本太高,選址又偏遠,有議員提倡改建啟德方艙,亦有提倡隔離營改建以減低成本,總之畀人彈到樹葉都落!依家房屋局首階段冀斥資321億元喺4幅偏遠用地趕住建3萬簡約公屋,就眼濕濕扮憂鬱,又話可壓縮空間,又誓神劈願指可提供交通配套服務,差在未話送叉燒飯!一早做好周密政策,唔好隨便噏當秘笈,咪唔使搞到揦手唔成勢咁笨拙難睇囉!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500