政情：角逐港區人大當選 吳永嘉：任重道遠

獲悉當選結果嘅吳永嘉表示十分高興，話港區人大屬全國性工作，肩此公職可謂任重道遠，承諾未來會努力裝備好自己。對於要身兼立法會議員同港區人大兩項公職，吳永嘉話自己係習慣喺壓力下生活嘅人，自信在時間分配上能妥善處理兩者嘅工作。至於會否因港區人大嘅公職而減少參加立法會事務委員會嘅工作，吳永嘉就話要等到正式上任後再視乎情況而作決定。

同吳永嘉一樣，當選港區人大嘅立法會議員仲有梁美芬、陳振英、黃英豪、陳仲尼、霍啟剛、李慧琼，至於馬逢國、林順潮、陳勇、吳秋北、陳曼琪等議員就屬於現屆港區人大並成功連任。另外，胡曉明、雷添良、李引泉、陳曉峰、朱葉玉如、鄺美雲、蔡毅、姚祖輝、李應生、陳振彬，亦都係成功連任嘅港區人大。

其餘成功當選嘅港區人大包括，樓家強、冼漢廸、李聖潑、徐莉、楊德斌、凌友詩、林至頴、黃錦良、文頴怡、孫偉勇、朱立威、沈豪傑、黃冰芬。曾任運輸及房屋局局長嘅陳帆亦成功轉換跑道。

今次選舉共有42名候選人角逐，香港科技大學校長朱葉玉如取得1,254票膺票后，陳帆亦取得1,206票。另外，謝愛紅、前全國人大常委范徐麗泰之子范駿華、沈慧林、林天行、陳正欣及鄭國杰等6人落選。今次大會共發出以及收回1,273張選票，最終有效票為1,267張，廢票有6張。