政情：探訪罕見病青年 謝展寰盼有藥可治

人生不如意事十常八九，但點樣逆境自強，就成為最大挑戰。而本月將踏入14歲嘅陳梓鍵，患上發病率僅五千分之一嘅「杜興氏肌肉營養不良症」，預期壽命只有約18歲。但佢未有放棄，亦都夢想成為YouTuber，而環境及生態局局長謝展寰尋日就去探佢，表揚佢成為好多病患者嘅榜樣，仲話內地有公司正研發相關藥物。陳母亦指生命嘅延續都需要藥物，希望政府將罕見病患嘅藥物列入相關名冊，同時畀多啲資助，包括家庭情緒支援。