昔日東方政情：染疫疑雲問候歐家榮 袁國勇漏風聲
疫蹤處處，陸續有政府人員確診。自上周四出席疫情記者會，之後再無露面嘅衞生防護中心傳染病處首席醫生歐家榮，近日有傳言指佢染疫，亦有消息話佢因同住家人確診而被列入密切接觸者，到底邊種講法至係真呢？儘管當局三緘其口，話唔會就個別人士作評論，然而政府專家顧問、香港大學微生物學系講座教授袁國勇，尋日唔覺意漏口風「祝佢（歐家榮）快啲好番」喎！簡直係「雞蛋個殼咁密都孵得出雞仔」囉。
袁國勇尋日出席物業管理業監管局舉辦嘅專題演講，話題係圍繞物業管理如何配合抗疫。當佢講到登上不同大廈考察病毒傳播，期間展示一張佢同歐家榮喺某樓宇天台拍攝嘅合照，跟住就話「祝佢快啲好番」，似乎間接印證歐確診嘅傳言。即使消息不為衞生防護中心傳染病處主任張竹君嘅證實，但最終都畀袁國勇爆咗出嚟，真係夠晒老友喇！
講番尋日嘅專題演講。過去屢屢親自上前線，化身為「驗樓專家」嘅袁國勇，就總結抗疫7大教訓。
籲勿亂改廚廁喉管
佢語重心長咁提醒市民，千祈唔好隨意改動廚廁喉管，加上病毒可以喺喉管長時間生存，需要定期為U型隔氣管注水。袁話香港好多建築物出現老化情況，導致喉管出現問題，令到病毒喺空氣傳播，係前所未有嘅快速。袁建議嘅新建築規範應包括污水渠、U型隔氣管等喉管維護，重建不符合規範嘅舊樓以及解決喉管滲漏。
袁國勇仲話，唔少人喺開啟抽氣扇時，同時打開廚房、廁所及走廊窗戶，導致室內形成強負壓環境，令氣流從天井返回室內。因此喺開動抽氣扇時，亦應緊閉窗戶，避免形成太強嘅負壓，將病毒抽入家居。袁又特別關注疫情資訊發放，指物管業人員發現大廈出現問題時應主動通報，例如見到不同渠管或垃圾房出現問題，亦要向住戶傳達資訊，令獨居長者可以了解疫情發展。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
