要聞港聞

笑看天下:燙手山芋掟得快好世界

登山,要不畏艱難地攀爬,才能登上頂峰;同樣,做每件事都要不怕困難,富有責任心和使命感,才能把事情做好。呢,眨吓眼本屆政府即將下台了,然而是否真如林鄭月娥所說,「前人種樹,後人乘涼」?
實情係前人種子都未播,反而有唔少「燙手山芋」要後人接!嗱,特區新班子最迫切嘅莫過於調整防疫抗疫政策。嗰位「喊包上身」嘅食衞局局長陳肇始仲要爭取時間,於任內發表其死唔肯斷氣嘅最後網誌。各位,都唔使問阿貴咯,一個二個高官回首前塵往事,不是往自己臉上貼金,就係讚美自己如何為民,講到自己仿似為國為民、鞠躬盡瘁嘅「俠之大者」咁款;又或自吹自擂如何「犧牲」,彷彿自己係做緊「義工」,完全唔記得自己人工福利高過歐美政要,你話係唔係吹脹呀!
嗰位只知多謝現任行政長官嘅陳肇始,日前喺網誌回顧食衞局轄下食物科5年嚟所推進嘅工作,包括環境衞生及殯葬服務、食物安全,以及漁農業發展嘅範疇,佢仲特別提到當局加強處理鼠患。巴閉咯!老朽唔係指滅鼠成效,而係指政府去年投放逾7億元公帑去滅鼠,創過去5年新高,結果抬高老鼠身價,花逾一萬個大洋先捉到一隻老鼠!咁嘅「威水史」,好心咪攞出嚟獻世啦!
呢!卸任在即嘅勞福局局長羅致光最精於「數口」,佢亦發表網誌,指本屆政府嘅社福開支增幅達57.2%,係回歸後歷屆政府之冠,如「在職家庭津貼」增幅兩倍多,社會福利開支嘅增幅就更高;佢仲自詡安老復康使費飆升,仍在追落後,廢噏完一輪就大腳將個波踢畀下屆政府:希望日後特區政府為改善民生,特別是改善弱勢社群嘅福祉上,繼續努力!一個燙手山芋話咁易就掟出去,爽呀!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500