政情：蘇樺偉拍片 為DSE考生打氣

傷殘人士田徑世界紀錄保持者，畀港人喻為「神奇小子」嘅蘇樺偉，日前喺社交平台上載咗一條短片，話下星期就係中學文憑試開考，考生要喺疫情下專心溫書，真係唔容易㗎，又叫考生要對自己有信心呀，相信呢個難關一定會撐得過去，呢段時間佢會陪住考生，仲祝願大家一切順利，加油！

早前考評局已制訂後備方案，若疫情喺4月初仍未明朗，文憑試將延後至5月中開考，若到4月下旬疫情仍未明顯紓緩，則會進一步把筆試延後至6月初舉行，依家定咗喺4月22日開考，而竹篙灣隔離設施設有特別考場，畀密切接觸者考生同確診而病情較輕嘅考生應考。