昔日東方政情：大嶼南研建保育區 區議員促公權力收地
保育管理係世界大趨勢，大嶼南就到處有好多具生態價值嘅物種同植物，但保育時間表就未見影。尋日有區議員喺離島區議會會議，講到政府喺《施政報告》提出《北部都會區發展策略》，建議首次運用公權力收番南生圍及豐樂圍等2,000公頃嘅魚塘濕地，建立3個保育區，認為可以「有樣學樣」，收番大嶼南私人濕地做保育，又話收地刻不容緩，擔心政府反應「慢半拍」，到時破壞咗就冇彎轉！
擔心政府又慢半拍
區議員郭平提出大嶼南私人濕地同荒廢農地可倣效相關建議做保育管理，並對於發展局同土木工程拓展署可持續大嶼辦事處無出席大會感到遺憾。佢話因收購土地程序需要時間，憂慮10年之後大嶼南私人濕地同荒廢農地都會被開發，到時再保育就太遲。佢仲引用顧問公司喺3個先導地區進行嘅生態調查，將貝澳、水口同大澳嘅整體生態重要性分別評為高、極高及中等至高。
另一議員黃漢權就話依家有人大做文章話大嶼南嘅發展係破壞，又反問如果喺自己嘅土地上復耕同除草係咪犯法，話政府似乎同鄉郊製造咗一個矛盾，佢希望還鄉郊人士公道，認為「收咗佢（土地），大家就開心。」
但區議員何紹基就唔支持相關建議，話大嶼南私人業權分散難處理，加上唔認同有小量動植物就要進行保育，又話依家嘅發展唔係破壞環境，應該更詳細同各持份者諮詢。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
