昔日東方政情：曾捲天價選舉開支案 沈旭暉留台與港割席
舊年曾捲入立法會巨額選舉開支案件，目前身在台灣嘅學者沈旭暉，尋日喺社交平台貼文，指為迎接人生另一頁，佢已辭去所有喺香港嘅學術機構、公司及團體董事、職位同持份。今後喺台灣同海外新成立嘅公司及業務，都同香港以前嘅公司一概無關，莫非佢想同香港「割席」？
原定舊年9月舉行嘅立法會選舉因疫情而延期，但參選人仍然可以申報選舉開支。當時參選區議會（二）嘅元朗前區議員王百羽同九龍城前區議員李軒朗組成嘅名單，所申報開支接近490萬元，其中逾450萬元嘅選舉服務及貨品由「U Made This」公司捐贈，而公司最大股東則為學者沈旭暉創辦嘅「GLOS Company Limited」。
辭去香港所有職務
沈當時迅速撇清關係，話自己唔認識王百羽，仲強調難以認同金額係合理。事隔近一年，沈就決定辭去喺香港所有職務，又話自己已經完成訪問學人生涯，未來一年喺台灣某大學擔任副教授。
之但係，王百羽同李軒朗就無咁好彩可以「迎接人生下一頁」喇，其中王因為涉參與舊年民主派「35+」初選，涉違《港區國安法》而被還押。至於李喺前年區議會選舉期間涉選舉舞弊，及後被裁定非妥為當選而喪失區議員資格。李於今年5月宣布流亡。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
