政情：母校宣布停辦 梁繼昌發傷心貼文

梁繼昌喺社交平台話喺1974年度畢業，要對辦學團體講：「對你們的決定我們深感遺憾、傷心和失望！」回想從前，佢話母校喺1959年由西班牙教會創辦，而辦學團體嘅教育理念好前衞同有前瞻性。

仲記得幾十年前嘅小一年代，除咗中文同社會科之外，課程已經全用英語授課，但每星期都有兩堂普通話課，由嚟自北京嘅老師授課，當時漢語拼音仲未普及，而要學習台灣嘅拼音符號。唔單止咁，佢話母校喺10幾年前又喺小學推行西班牙語課程添！

佢認為母校嘅教學理念同對宗教教育嘅堅持，栽培咗一代又一代視野廣闊嘅香港人，其中亦有唔少香港人熟悉嘅校友，佢希望散落世界各地嘅校友能夠延續母校的精神同使命。

呢間學校確實有唔少名人校友，而梁繼昌呢篇「傷心殺校」嘅貼文出咗之後，隨即貼文有唔少網友留言，仲意外發現已經去咗英國嘅觀塘前區議員畢東尼都係校友，畢東尼話：「師兄，估唔到我離開香港後，每日睇新聞都好多嘢變咗，但連自己間母校都冇埋，心情實在好難接受。」佢冇講自己係邊屆嘅畢業生，但就透露係同歌手甄楚倩（Stella）同班。