政情：辭任區議員 出獄重操舊業 文念志做紮鐵

其實文念志喺當選做區議員前就已經靠紮鐵支持日常生活開支。佢喺貼文中話，喺呢個非常壓抑嘅香港，做隻專心搵錢嘅「港豬」都唔錯。

佢又話眼見唔同辭職或被取消資格嘅區議員有唔同發展方向或去向，有啲喺外地，有人搞小生意或做番以前嘅正職，至於佢就只係用最污糟嘅手賺最乾淨嘅錢，直言自己「係窮」，但「揸得起支勾（鈎）仔，揹得起頭家」。

由區議員身份再變番地盤佬，唔知佢有咩感受呢？佢就話終於唔使再怕精神疲勞，因為依家似肉體上更攰，仲強調會繼續以不屈不撓嘅精神去生活同工作。佢仲晒出地盤佬個人金句「安全返到屋企當你贏」，「捱過大暑當你贏」咁話。

睇番今屆幾位已辭職嘅區議員都紛紛「轉行」，希望另覓出路。沙田前區議員趙柱幫喺7月初辭職後，雖然自畢業後一直從事社福工作，但為保兩餐就考咗牌投身地產代理嘅工作。之但係就唔係人人都咁好彩成功，就好似涉詐騙政府發還立法會選舉開支嘅油尖旺前區議員林兆彬，早前就將原本位於太子道某商住大廈嘅議辦改為零售用途，販賣日常生活用品，但僅僅3個月，就喺上星期宣布結業喇！