絲絲講場：麥當勞向員工派500蚊利是

農曆新年話咁快就到喇！雖然香港經濟大家都無眼睇，但被視為「窮人恩物」嘅麥當勞就向旗下逾一萬名員工，大派500蚊「麥麥打氣」利是，銀碼同舊年一樣，無縮水！

一連3日搞年度晚宴

數數手指，每封利是可以買到17個價值29蚊嘅超值套餐，仲有7蚊找。絲絲仲八到，麥當勞下個月會喺亞洲國際博覽館搞員工年度晚宴，一搞仲要搞3日，因為有成8,000人咁多！

難請人向來都係餐飲業痛頭問題，香港麥當勞行政總裁黎韋詩亦好識做，公開感謝所有同事努力，嚟緊亦會繼續支持團隊，希望延續去年強勁氣勢，再創新高峰。

最後，絲絲都祝願新一年股、樓興「龍」，最緊要身心健康，平平安安，各位打工仔收封漲卜卜嘅開工利是，同老闆一齊行大運發大財啦！

余絲韻

爆料熱線：

(852) 3600 3600

傳真：

(852) 3600 8800

SMS：

(852) 6500 6500

電郵：

網上爆料：

MMS：