絲絲講場：NIKE入稟告BAPE波鞋侵權

NIKE喺入稟狀圖文並茂咁比較NIKE嘅AF 1，同BAPE嘅BAPE STA，指控除咗Logo唔同之外，兩款波鞋肉眼望落可以話係一模一樣，力證對方波鞋侵權。

據NIKE所講，由2005年起BAPE喺美國推銷嘅多款波鞋，同自家波鞋設計極為相似，所以喺2009年試圖同對方交涉。雖然NIKE冇交代交涉結果，但隨後BAPE創始人長尾智明辭任行政總裁，又將BAPE美國門店逐一關閉，2011年更賣盤畀香港前上市公司I.T。由於BAPE唔再活躍於美國，加上公司重新設計BAPE STA，侵權事件先不了了之。

詎料2021年BAPE又突然將涉嫌侵權嘅設計「復活」，眼見BAPE STA重新喺美國大賣，NIKE話BAPE嘅侵權行為已發展成為對公司權利嘅重大威脅，必須立即採取行動，要求BAPE就此作出賠償，並禁止有關波鞋喺美國銷售。