化身美女車長學理財姚焯菲掌管財政大權構思創自家品牌

「聲夢小花」姚焯菲昨日化身美女車長出席活動，她稱現時大個女，由自己掌管個人財政大權，並笑言最近才知道自己有多少錢，但就否認是小富婆，謙稱只是足夠花費而已。

姚焯菲（Chantel）昨日出席「TrendyToo理財新手綫財智講座暨玩創市集嘉年華」開幕典禮，她先以車長造型制服示人，之後換上白色外套及短裙上台，接受中銀香港個人金融及財富管理部副總經理溫晞文頒發的證書，正式成為品牌大使。

Chantel透露今次是首度穿制服，感覺新鮮又奇怪，講到理財，她稱小時候會交由家人打理，18歲後就開始自己管理：「暫時都係放銀行定期，但有問家人投資心得，我都幾有興趣。（係咪盡得爸爸真傳？）有學到，家人有教買嘢要有需要先買，唔好一次過花太多錢，要儲起啲錢以備不時之需，留番大學嘅時候可以用。（你最近接咗唔少工作，係咪小富婆？）我係最近先知自己嘅數目，有足夠嘅錢去用。」

偶爾放肆 Set定限額

問到Chantel是否慳妹時，她坦言偶爾會放肆一下，但花錢時也會設置限額，當有昂貴的東西想買也會停一停想一想再決定，問到買過最貴的東西是甚麼？她笑言：「我啲錢都係用喺食同買衫方面。」至於問到可有人向她借錢，或有否曾經受騙？她慶幸從未試過：「我都聽過唔少人話遇過電話或網上騙案，家人都有提醒我收到電郵或網站連結時唔好亂撳入去。」

另外，Chantel在現場創意市集的攤位中售賣自家品牌「C2」的產品，她解釋該品牌由她與粉絲後援會合作：「我哋出咗袋同暖手器等比較實用嘅產品，係最近先推出，部分錢會捐去熊貓基金，我有份參與設計，我之前都有同慈善團體合作出衫，但都係短期性。（有冇諗過創立自己品牌？）都想，但依家專注唱歌先，如果創立品牌最想出衫，但要搵個拍檔，因為我會質疑自己，需要對方畀信心我，我有好多構思，但我畫畫唔叻。」