陳安立林希靈散席即造人！賜劉佩玥名分？周志文：希望開心事快啲嚟

陳安立與林希靈年初宣布婚訊，昨日假深灣在一眾親友及牧師見證下，正式拉埋天窗，並筵開20席分享新婚喜悅。一對新人邀得許家傑、羅天宇、周志文及周志康等擔任兄弟，鄺潔楹則做姊妹團，而陳庭欣、劉佩玥（Moon）及ERROR成員肥仔等都有現身送祝福。

一對新人受訪時表現輕鬆，更應記者要求示範「巴黎鐵塔反轉再反轉」咀嘴，問到造人大計，他們打趣表示：「今晚冇After Party，要努力喇！七師傅（七仙羽）話床位要向北，跟住攞我哋朋友嗰支話可以決定生女或生仔嘅潤滑劑出嚟！（好急？）順其自然啦，都想過少少二人世界，但如果有『禮物』都開心嘅。」陳安立坦言想生孖胎，林希靈則說：「我哥哥生咗3個，佢完成咗歷史性任務，我就想生女，不過啲契爺全部咁靚仔，我驚佢大個嫁唔出！」

至於Moon與周志文戀情傳足多時，她現身婚宴時被記者逮個正着，二人終大方合照及受訪，Moon表示：「陳安立係我中學師兄，冇諗過入行識埋佢嘅另一半，好開心！（今日嚟取經？）戥人開心啫！（冇After Party，你哋兩個平安夜有乜節目？）我要為即將開拍嘅新劇改造型，會約屋企人食飯。」志文接口：「睇吓等陣班兄弟有咩活動囉！（唔約Moon？）佢做嘢嘛！」

記者追問他們何時才公開關係，Moon笑說：「咪公開咗我哋係好朋友囉。（志文好緊張喎！）佢今朝好早起身啫，做兄弟唔通好似我依家先嚟咩？」談到「進一步」時，志文表示：「我諗每日都進步。（女仔咁大方，幾時畀名分佢？）要咩名分？年紀大咗隨緣，唔需要諗咁多，交畀個天安排，自己希望開心嘢可以快啲嚟。（買咗聖誕禮物交換未？）平日大家都會買禮物，喺派對上整蠱人，令對方又驚又喜。」記者提議買戒指，Moon即舉起雙手大叫：「唔使喇，好多呀！」