童童唔吼男友獨食米線劉以達不甘被爬頭「追瘦」老婆

藝人劉以達因疫情經常留家叫外賣，結果令向來為食的他衝破200磅大關，急急搵營養師實行減肥大計。他於9個月內成功減掉30磅，但瘦身程度竟不及陪他減磅的太太，阿達表明不會就此罷休，誓急起直追！

藝人劉以達、網紅童童及程人富，昨日現身旺角的「譚仔三哥」。久未露面的劉以達明顯比之前清減，他透露年初開始減肥：「最『嘟』差不多200磅，為咗健康同好睇啲，跟營養師開始減磅，依家仲繼續減緊，想減多10磅。」他笑言營養師餐單很好，可以食肉，但就要食烚菜，又說：「除咗食仲要做運動，我買咗部跑步機，最積極嗰陣每日急步行2次，每次半個鐘。」他透露太太陪他一起減磅，結果比他更成功：「佢落街緩步跑同買餸，依家減咗40磅。」

程人富蜜蜜食

至於程人富透露平日習慣與女友一碗米線兩份食，童童即大讚相當Sweet，問她會否也想找個伴一起Sweet住食？她說：「我自己可以食晒一碗過橋米線，哈哈！」