繽FUN星網棟篤笑搞Gag 阮兆祥拋港式英語 向麥明詩求教

為籌備一連兩場的棟篤笑騷，阮兆祥由度橋至完成僅花了個多月，除了圈中好友撐場，連媽咪及一班追隨多年的鐵粉亦瞓身支持，既舉燈牌，又送上花束及禮物，令他感動非常。由於疫情已持續兩年多，大眾面上的笑臉逐漸消失，故祥仔決定炮製一個會令人開心兼笑足全場的棟篤笑Show，內容不乏有味笑話，但樂而不淫。

祥仔坦言於緊絀時間完成兩場演出，感覺如釋重負：「呢個騷唔係一件簡單事，預備時間太緊迫，由內容到製作，點樣配合個騷。不過小惠帶領嘅團隊好出色，個騷係用演唱會成本去做，我好期待下一次演出。」談到席間把「十優港姐」麥明詩擺上枱，表示要跟對方學英文，祥仔笑說：「都係借題發揮，讀得法律，英文一定好，如果講到美貌與英文並重，一定諗到佢！（你仲出賣小惠，擺埋佢張相出嚟！）呢樣佢係知嘅，只係堅持張相唔畀後期製作，本來我想將外國人相同佢二合為一。」

對於小惠家姐梅小青一度以為他與小惠會成為情侶，最後卻只成為閨蜜而感失望，祥仔表示：「有時一世做朋友，比起一世做夫妻來得長久，大家咁多年似兄弟感情，大家心照。（你陪小惠度過最唔開心嘅日子！）好朋友就係要咁，感情只係過程，友情更長久都未定。」

提到媽咪睇騷睇到哈哈笑，祥仔指媽咪為人樂觀，亦是受她啟發才成就今天的他。至於一班鐵粉就不用多說，他指最長情的一位粉絲已追隨了30年，雙方感情極好，其中一位粉絲更邀他擔任證婚人：「佢邀請我時都懷疑過佢媽媽會唔開心，但佢老公都係我粉絲，所以雙方家長係默許咗。我可以話係見證住佢哋成家同有小朋友，呢份感情好難得。」

至於與祥仔相識逾20載的康華，亦專誠調配工作撐場。她難忘首次與祥仔出埠拍節目，期間在旋轉觀光塔遇上停電，結果一行人從5層高的直梯爬下來，祥仔更率先到下方作保護，慎防大隊一不小心掉下去：「佢真係好細心，呢件事到今時今日我都好記得，所以佢Keep住喺我心入面好多年。」大家睇完首集棟篤笑唔夠喉？第2集內容會更加精彩，還有談及擾攘多時的疫情問題，以幽默風格來演繹，如「渣男會開心，點解呀？因為仲未通關嘛！佢哋惟有留港通姦！」