游莨維染疫 「東張女神」高度戒備 戴祖儀高燒喉痛 粥水食到怕

香港第5波疫情險峻，確診人數直線上升，無綫「藝員群組」亦陸續擴大，繼周嘉洛、羅樂林、馮盈盈、胡定欣，以及正在拍攝節目《學是疫學非》的戴祖儀「中招」後，昨日再爆出《東張西望》外景主持「一蚊Joe」游莨維及兩名導演感染新冠肺炎，記者致電游莨維未有回覆。有份做《東張》外景主持的利穎怡及何沛珈亦有所聽聞，利穎怡表示：「我有聽過，不過因為我比較少開突發組，所以比較少接觸到。做外景風險一定有，但都沒有太擔心，畢竟依家疫情防不勝防，惟有做好個人衞生。」而何沛珈近期正拍攝《學是疫學非》，她指自己每日都有做快速檢測，並且會準備好防疫裝備給同事用，下星期亦將會返《東張》：「到時出外景會戴兩個口罩同埋眼罩，自己會準備埋飯盒，避免同人一齊食飯。」

正自我隔離的戴祖儀，日前特別開Live講述箇中過程及感受，一臉倦容的她表示：「我一直留喺房間隔離，每日不斷煲劇。離開房間嘅時候會戴上口罩，好彩屋企有兩個廁所，我同家人分開用，可以減低感染家人嘅風險。頭兩日發燒發到40度，到第3天就慢慢退燒。不過，我覺得最討厭嘅係喉嚨痛，頭一、二日喉嚨好痛、好辛苦，依家仲有少少鼻水。」她亦指已向衞生署申報確診事宜，但可能衞生署太繁忙，而她亦能在家自我隔離，故會將資源留給有需要的人。

談到在家如何紓緩病況，戴祖儀透露：「我唔知道其他人啱唔啱，我都可以分享自己嘅方法，我每日都會用鹽水洗鼻同漱口，比例係水、鹽10：1；同埋都有飲好多水、食藥、維他命C，同狂飲檸檬水。」她亦有在社交網留言指自己精神及身體都好好，只是食粥食到懷疑人生，圈中不少朋友如林奕匡及林穎彤亦有為她打氣。