呂慧儀再撐「老公」聽話 男友做最強後盾 JW「免疫」無懼催婚

歌手王灝兒（JW）、薛家燕及《愛．回家之開心速遞》一眾演員劉丹、滕麗名、呂慧儀、蘇韻姿等，昨日錄影賀年節目《金虎獻瑞耀保良》。呂慧儀劇中老公張景淳，傳因經常遲到而被訓話兼踢出劇組，呂慧儀被問及此事即拉開話題：「新年新氣象，乜都會好。（係咪如傳聞咁講？）因為一個人講，所以愈傳愈誇張，其實冇乜事，大家都好勤力做好本分。」又為對方說好話，指大家會愈做愈好，並讚「爸爸」劉丹教得好，連「熊家女婿」亦好聽話。

劉丹亦開腔為「女婿」護航：「有冇聽過一個笑話，有人話山上有個窿，傳傳吓變咗山上有條龍。」談及農曆新年，他指兒子劉愷威已返港：「難得喺香港過年，佢應該會留耐少少，為咗返嚟過年，佢都推咗唔少工作。」

另外，JW表示近2年沒有出歌，今年會專注音樂：「已經錄咗一首歌，希望過年前錄多首。（為咗4月嘅頒獎禮爭獎？）我完全冇諗，唔想為獎項框死自己。」問到「終身大事」會否納入新年計劃？她再強調專心事業：「我同男友感情穩定，所以唔急，愛情係大家後盾。（唔怕拜年被催婚？）疫情下擺酒都唔方便，所以催婚話題今年可以免疫。」

薛家燕則透露孫仔已學懂請請拜年，氹得她非常開心，提到來年運程，她笑說：「李丞責話我有喜事同可能攞獎，我以為會中六合彩！」