捱更抵夜 解答訂票疑難 張敬軒趕絕黃牛 個唱加5場

張敬軒為慶祝入行20周年，將於12月23日起假紅館舉行10場《Hins Live in Hong Kong The Next 20張敬軒演唱會》，由於優先訂票及內部認購已告超額，加上最近網上出現炒飛潮，令軒仔不得不出手在網上叫黃牛黨「過主」；同時又擔心天氣轉涼，歌迷冒寒瞓街排隊撲飛，故昨日主辦單位在未正式公開發售門票前，即宣布加開5場共15場，打破軒仔的個唱場數紀錄。

軒仔自資7位數字擴大網上訂票網站人流容量，建設網上訂票程式，方便歌迷會會員可於9日公開發售前一天在網上優先訂購，並提供詳細的訂票教學指南，還暫停2日新歌宣傳期，親身到工程公司作網絡系統測試及監察，最難得是他捱通宵在網上逐一回答歌迷的海量訂票疑難，擔任最強的「星級客服」。

軒仔接受訪問時，安撫歌迷毋須擔心他為回覆歌迷查詢而積勞成疾，覺得最重要是歌迷一個都不能少，他說：「湊到我咁大隻，歌迷有問題，我回覆係應份的。開演唱會最大嘅動力係為佢哋而開，我希望可以喺每一場親身多謝佢哋每一位。」