用番舊名 重新出發 江若琳官司纏足7年 搞掂先造人

江若琳昨日與老公蕭唯展及陳柏宇等出席寵物活動，宣布用回舊名，因有感「江若琳」已深入民心。現場見她與老公清減不少，原來兩夫妻目前每日至少跑5公里，蕭唯展更於短時間內成功減去20磅。江若琳大爆老公身體狀況：「佢本來中年發福，又畀醫生驗到高血壓，所以積極減肥。」

本月30日生日的她坦言不會大事慶祝，事關有「煩心事」。記者問到是否經理人合約官司「殺到埋身」，她默認：「希望11月可以解決，跟住重新出發。前後經歷咗7年，不過凡事都有兩面睇，例如我呢段時間嫁咗個好老公，同埋將興趣變為事業，開設貓酒店。」她續說：「其實間中都有劇本搵我，等件事完咗，有啱就拍，或者會將啲經歷寫落首歌推出。（仲敢唔敢簽公司？）No, Thanks！不過隨緣啦，所有嘢個天會安排。（生B沖喜？）唔想下一代同我一齊面對壓力，係都等所有嘢結束先。」

陳柏宇則透露現時家有兩貓一狗，之前養的有部分已離開：「淨低嘅都12、3歲，有隻貓仲要長期病患。囡囡出世之後，有一隻走咗，當時佢仲未識，但識係好事，因為怕失去先會識珍惜。」又指囡囡與家中寵物相處融洽：「佢得廿幾磅，但好鍾意抱起屋企最重嘅貓，隻貓都十幾磅。（如果啲寵物走晒，會唔會再養？）會，養得寵物呢個係必經嘅階段，但養嘅過程值得嘅。」