伊高沙托尼：提升狀態爭聯賽

前香港足球先生伊高沙托尼，1月份再次重返香港球壇加盟傑志，是役面對深水埗終憑12碼「開齋」。賽後「伊高」十分開心：「因為呢場波大家都踢得好好，今日自己其實有好多入球機會，可惜把握唔到，希望之後入球陸續有嚟，同埋我都想為隊友交出更多助攻。」「伊高」又指今季未有為自己訂下任何入球要求，目標是替傑志贏得所有比賽，爭取成為聯賽冠軍。

加盟「藍鳥」僅一個月的「伊高」，已經連續兩場為球隊擔任正選，他坦言自己狀態正逐步提升：「呢場係我第4場波，頭兩場都係打後備，踢得唔多；近兩場踢番正選，狀態提升咗好多，喺場上踢得更加舒服，希望未來繼續改善。」「藍鳥」早前簽入南韓射手金信煜後，前場出現人滿之患，「伊高」認為擁有多位高質素進攻球員，對球隊絕對是好事，而且在強隊中亦屬正常情況，自己會竭盡全力爭取正選。