梁靖琪墮海被掹腳

藝人梁靖琪（Toby）在劇集《家族榮耀之繼承者》被「哥哥」羅子溢意外推落海致死，劇組日前發布相關場口的拍攝花絮，Toby受訪時透露本來堅持親身上陣，但遭現場台前幕後阻止：「真係跌落海唔係我，嗰位女替身飛身出船邊嗰下好驚險，我喺側邊睇都戥佢擔心，到最後跌落海嗰個係我自己。嗰一幕都拍咗幾耐，因為真係要沉落去，拍第一個Take時我浮起咗，之後就加啞鈴希望有啲重量沉多啲，後尾都唔得，要由着住潛水衣嘅工作人員潛入水底拉我落去，等我拍出嚟好似真係沉落去咁。」