朱晨麗讚朱敏瀚身形正僅次C朗

朱敏瀚與朱晨麗昨日現身劇集宣傳活動，男方於劇中例牌騷肌，朱晨麗笑言開工首天便見識到對方胸肌，大讚是心目中前3名，可謂大飽眼福，不過朱敏瀚對自己的身形未夠滿意。

朱敏瀚（朱仔）、朱晨麗（朱朱）、蔣祖曼及龔慈恩等昨日為無綫劇《輕．功》宣傳，朱仔透露於劇中有除衫騷肌場口，但對自己身形不太滿意：「當時因為疫情嚴重，健身室關咗，我靠屋企有限嘅器材操肌，係我咁多次除衫戲之中最吃力一次，冇之前操得咁好，效果同我想像中有差距。」朱朱表示首天開工正是拍攝朱仔的除衫戲，大讚對方身形靚：「係我心目中Top 3，我都係有見過世面。（其他兩個係邊個？）湯告魯斯同C朗。」

蔣祖曼首當女一壓力大

提到朱仔在頒獎禮上獲提名男主角及男配，他自認好彩，之前連續兩年皆有攞獎，坦言今年最希望憑《痞子殿下》奪拍檔獎。至於近日生日的朱朱感恩獲眾多朋友慶生，揚言吃了近20個蛋糕，生日願望是不要變肥。

至於蔣祖曼首度擔任無綫劇女一，她坦言壓力大：「呢類生活小品嘅劇種我未拍過，由開拍前到拍攝、直到拍完都好驚，驚咗半年，心諗我會唔會從此息影，後來監製同宣傳人員睇過套劇都話冇問題，叫我放心。」她指角色對父母惡死，初時不敢去盡，但被監製要求要更惡，才可突出角色性格，並強調現實中跟父母關係要好。