受不雅視頻風波困擾 林鈺洧忟憎眼濕濕：做呢啲嘢有報應！

林鈺洧（Denice）、梁超怡、邢慧敏與馬德鐘一家，前晚出席名媛趙曾學韞舉辦的慈善晚宴。Denice受訪時一臉忟樣，與近日「假三級視頻」流出不無關係，她無奈說：「少少困擾啦！已經同公司一齊報咗警，交由警方處理，警方亦搵到源頭，係來自日本色情網站嘅其中一條片，好快幫我洗脫『罪名』。（好肯定冇拍過所以唔驚？）係。（以前拍拖有冇被要求過？）冇。（諗到邊個陷害你？）唔知，交由警方去查。（點調節心情？）食薯片同飲可樂，將成肚氣吐番出嚟！」

問Denice是否得罪人？她說：「唔清楚，控制唔到人哋點解要咁做，我淨係好努力做自己，成日都有呢啲嘢撲埋嚟，雖然我復原能力快，但都應該停一停。我每日都好多嘢要做，要學普通話、背稿，咁好打擾同影響我情緒。」收到消息當日，是她連踩6日後的假期：「收到短訊話要即刻去警署，咪去囉！做呢啲嘢一定有報應，搞衰人自己唔會好得去邊。次次出席有意義嘅活動，大家因為工作需要而追訪我，明白嘅，但呢啲消息搞到成件事好醜同假，我真係唔想搶Fo！」愈說愈激動的她，更一度眼泛淚光。問梁超怡及邢慧敏有否安慰好姊妹，她們說：「佢咁大個人，識得處理喇！」

馬德鐘的兒子馬在驤首度帶芬蘭籍女友現身，馬德鐘否認恨飲新抱茶：「冇咁快，想佢做好自己嘢先。（拍咗好耐拖？）唔知拍咗幾耐，但我知道冇耐，佢哋返嚟放假。」其太太則對「未來新抱」讚口不絕：「佢好好，本身係護士，佢哋游水識嘅。」