忙拍劇奉旨賴皮 ERROR開騷零準備 193：預咗唔好睇！

組合ERROR、宣萱、姜皓文（黑仔）、張慧儀及黎彼得昨日現身MakerVille原創劇《極度俏郎君》拜神儀式，ERROR成員保錡表示自細喜歡張慧儀，其他成員即踢爆他愛看對方的電影《強姦3：OL誘惑》。肥仔則指Dee嫌隊友戲屎，不時指手畫腳，而保錡亦大爆肥仔拍攝時睡着的瘀事：「大家等咗佢10秒，佢都未講第一句對白，仲以為佢咁入戲。」

提到組合下月舉行演唱會，問到是否有足夠時間作準備？193直言沒有，肥仔更開玩笑指：「可能取消。」193接話：「不如後年先開啦！哈哈！大家各有各忙，工作砌到好密，要12月先有時間排練，可能得兩星期準備。（到時打天才波？）咁又唔得。如果唔好睇，大家有心理準備，如果好睇咪喜出望外。」

至於黑仔笑言拍攝開心到不想收工：「我全家都好鍾意宣萱，包括屋企隻狗，聞到我個身有宣萱陣味，即時撲埋嚟。」提到無綫劇《下流上車族》原定男主角是他，黑仔即大讚林敏驄演得好：「甚至比我幻想中自己嘅演出更好。（拍唔到覺得可惜？）唔會，有機會好想同呢個團隊合作，當初係我話想拍喜劇，佢哋就寫呢個劇本畀我，所以覺得有少少對唔住。」講到今次對撼無綫？宣萱表示沒有多想：「拍劇講求開心，只要劇本、角色好就OK，收視唔係我控制範圍，留畀監製擔心。」

另外，同場的黎彼得去年底因入院做心臟手術而停工多時，他透露跟無綫仍有一年合約：「佢哋唔搵我開工，我溝通咗，可以喺出面拍劇。（會唔會再返無綫拍劇？）最好唔好啦！」