林敏驄催志偉裸跑找數郭柏妍學「阿媽」豪言底線除剩Bra

無綫劇《下流上車族》收視力壓《開心無敵獎門人》，昨日林敏驄現身活動時要求「153」曾志偉「找數」裸跑。而江美儀近日在劇中只穿胸圍出鏡，「阿女」郭柏妍表示如果劇情需要，不介意拍攝同類場口！

《下》劇一眾演員林敏驄、江美儀、郭柏妍及鮑起靜等，昨日現身深水埗向街坊派飯。之前無綫總經理曾志偉與林敏驄以《獎門人》及《下》劇的收視輸賭，輸家要裸跑，前日無綫公布收視，《下》劇成為上周節目收視之冠，林敏驄笑言：「有個（身高）153話要裸跑，有片為證！希望佢願賭服輸啦，佢喺屋企都經常唔着褲啦！」問到會如何要求志偉找數？他即以高八度聲線模仿對方：「搵到我先得㗎！」江美儀笑問阿驄是否願意裸跑換獎？他反問：「如果我裸跑完佢唔畀獎我點算？（即係有獎可以祼跑？）我從來唔做呢啲嘢。」

擬再扮女僕派福利

另外，江美儀在昨晚播出的一集上身只穿胸圍出鏡，她指該場戲原本講述她在街上很自信地行，但因下雨，故由室外改為室內拍攝，她遂「自動波」向導演提議可以着胸圍出鏡來表達自信，阿驄即搞爛Gag：「呢啲唔係自動波，係走下『波』！不過，除咗身材爭少少，佢心地善良，喺演戲上做助攻，完全唔自私。」江美儀反擊：「我仲好挺！你估你個肚腩，每況愈脹！」

同場的郭柏妍被問到若收視達30點，會如何派福利回饋觀眾？她表示可能會穿女僕裝踩滑板，即被取笑太小兒科，至少要泳裝上陣，她說：「着泳衣踩板會揈甩喎！」又指劇中亦有穿比堅尼的場口，拍攝前特別戒澱粉質3星期，減掉6磅，更揚言若劇情需要，亦不介意像江美儀一樣只穿胸圍出鏡！