等足17年圓夢泳兒時間緊迫焗住真空開騷

英皇歌手泳兒（Vincy）前晚於九展舉行《泳兒 VINCY CHAN BREAKING LIVE 2022》音樂會，是她轉走暗黑風格後的首個音樂會，圈中好友謝安琪、衛詩、陳健安及Serrini等到場支持。Vincy邀請了歌手鄧小巧、顧定軒及張進翹擔任嘉賓。

多謝歌迷不離棄

當她唱《破曉》時一度感觸落淚，並於台上分享感受：「呢幾年自己經歷高山低谷，感謝生命中所有Breaking同breakthrough，呢17年唔容易，一出道已經享受事業高峰，亦感受過被遺忘，多謝對我不離不棄嘅人，亦要多謝自己17年都冇放棄。」

完騷後，Vincy受訪時表示今次演唱會等了17年：「係入行以嚟最想要嘅演唱會，班底亦係幫我做碟嘅班底，係我嘅dream team，今次係我嘅dream concert。」她笑言因時間關係要真空上陣：「唱完要入後台換衫，接住衝番出嚟唱下一首歌，嚟唔切換咁多嘢。」當日剛巧是她的髮型師男友Ziv生日，問到如何慶祝？她笑言：「尋日切咗蛋糕，因為我驚今日會太專注喺演唱會。（送咩生日禮物？）咪蛋糕囉！」