Twins久別香港 唔認得人 阿嬌等待新戀情 追求者清零

阿Sa與阿嬌昨日身穿「白色閨蜜裝」出席活動，2人狀態大勇，阿嬌透露因接下不少內地工作，下月會再次北上：「我想令自己安定啲，所以喺內地養咗兩隻貓，要返去照顧佢哋。（今次踏入香港機場感覺係點？）喺度認親認戚，見到圈中嘅前輩戴晒口罩，所以要估佢係邊個，嗰種感覺既熟悉又陌生。」

談到花了半年時間回復苗條身形，更被阿Sa形容為「10年以來最巔峰的狀態」，阿嬌開心說：「依家係健康嘅，唔需要刻意去Keep。（最辛苦係邊個階段？）當時拍緊節目，啲拍檔好似吳謹言同王心凌不停喺度叫嘢食，佢哋食量好大，自己要好忍得！（係咪多咗追求者？）冇囉！呢樣嘢唔會留意唔到嘅。（已經做好心理準備接受新戀情？）可以嘅。」

問到阿Sa會否為阿嬌物色理想男友？她笑說：「有都介紹咗啦！剩番落嚟嘅就知咩事喇，一定有問題！（你之前北上，點同男友維繫感情？）又OK喎，佢都上嚟探咗我一次。」阿嬌更踢爆他們日日視像談情。阿Sa又說：「下個月我都會再北上，但之後唔會留咁耐，咪來來回回囉！」

對於有傳明年舉行演唱會，她們承認正在籌劃，至於會否邀請張致恒任嘉賓，阿Sa「嬲爆」說：「佢都唔係我哋公司，唔講佢喇！其實最大嘅煩惱係揀歌，驚唱唔晒經典歌，歌迷會𠝹櫈。」提到有份演出的內地節目《星星的約定》突然停播，她們說：「唔係腰斬，而係想重新剪輯，好快會復播。（係咪有份亮相嘅胡彥斌出事？）我哋冇聽聞，唔清楚，不過佢份人幾好。」