專責聆聽冇交嗌 Ian破分手魔咒 講女友甜到漏

Ian昨日以代言人身份出席在金鐘舉行的信用卡活動，吸引約30名粉絲到場支持，他透露：「7月紅館騷團隊部分未開始排練，自己部分就已經揀好歌，會重新編曲，都有保持操肌，不過今次唔會有太多裸露，會集中音樂上分享。」提到其新歌《GOT U》沒有太多宣傳，他覺得可以出歌已十分感恩，不相信公司將資源集中在某幾個隊友身上，也不覺有偏心。

談及Frankie繼Jer之後敵不過「MIRROR分手魔咒」，至於Ian與混血女模盧慧敏這一對能否打破魔咒？他笑得特別甜表示不擔心：「巧合啫！我哋還好，多謝關心。」他自言是一個好好的聆聽者，耳仔好過把口，自爆是Anson Kong的專用「樹窿」。他又表示從來不留意獎項，也不知道無綫與港台合併的頒獎禮中進步獎入圍名單沒有MIRROR成員，並笑言：「可能睇得起我哋，因為我哋都進步多咗，進步空間細咗。」

而另一成員Alton昨日出席劇集《大誠實家》的開鏡拜神儀式，他稱MIRROR經常持續直踩是慣常，自認捱得。之後就會開始演唱會綵排，Alton原以為5月開始排練，但原來大家都太忙，可擔心不夠時間準備？他說：「通常都係冇終點咁重複，所以一定覺得唔夠，今次壓力會大啲，始終喺紅館。」同劇演員還有ERROR成員阿Dee及徐㴓喬等。