昔日東方絲絲講場：券商風水測市 話虎年旺3行業
早前有券商因為一份A股風水指數報告被江西證監局「請飲茶」，臨近歲晚，近日再有券商發表港股風水報告。
查實有券商喺每年農曆新年之前都會發表風水指數，加上原本睇風水就係源自古時的傳統習俗，本來就唔算係咩稀奇事。不過，如今內地監管風暴正烈，早前有券商因為涉及風水分析股市被監管部門約談，風頭火勢下發風水股市分析，確係引人注目。
體品科技航運睇高一線
絲絲八到，寶新金融(01282)最新發表的港股風水報告預測，恒生指數在壬寅虎年將會先升後跌，行情集中在立春以後，「夏秋交季震盪，深秋見底回升」，仲話今年壬寅為「劫財坐傷官」格局，財運波折。
報告將各行各業分為「木火水土金」5大屬性，再分析行業新一年衰旺，其中睇好屬木嘅體育用品企業、屬火嘅新科技企業，同埋屬水嘅航運股。不過，報告開首都話供各讀者茶餘飯後消遣閱讀，皆為娛樂性質。
據悉，內地證監部門上次發出警示函，目的係要確保金融市場穩定，所以全面禁止證券公司、股評人以天象方法分析股市走勢。據內媒統計，今年以來已經有5家券商因為發表不專業研究報告而被罰。
至於總部設在香港的中信里昂證券（CLSA），每年皆有風水指數，絲絲又八到今個月18號會照搞一年一度嘅「風水指南」報告發布會喎，但CLSA已經講明，話報告係基於中國十二生肖「半開玩笑」嘅預測。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
