劇接劇 Chur到盡 袁偉豪現疲態嗌辛苦 蔡思貝搵時間撐「男友」

藝人袁偉豪（Ben）、蔡思貝及陳曉華等日前於西貢為無綫劇集《廉政行動2022》拍攝外景，他們湊巧同時要為剛開拍的《法證先鋒V》開工，相當辛苦！Ben明顯現疲態，笑言是「戰鬥」狀態。他受訪時說：「呢2星期辛苦啲，最好可以多啲時間休息，同時拍2套劇，又要轉景，今朝拍完同譚俊彥嘅打戲，成身都係泥，趁放飯時間返屋企沖涼。（飯都冇時間食？）偷少少時間食咗啲沙律，好在開呢套之前專登食肥咗，希望之後拍《法證V》時有時間做番運動。」

而Ben與思貝於《廉》劇中飾演師兄妹，於《法證V》則飾演一對戀人，她說：「我哋依家呢套係完全冇感情線，所以我收到《法證V》劇本時，就同Ben講：『嚟緊我要愛上你！』佢就話：「唔好轉Mode住，我哋《廉政》完先轉Mode啦！（有好默契？）之前合作過好多次，但唔多戲，今次大家溝通多咗，對佢熟悉多咗，情侶就係第一次嘗試，喺《法證V》嘅情侶關係都係悲慘嘅，睇吓到時大家有咩火花。」

另外，說到「男友」胡鴻鈞正為演唱會綵排，問到有否探班，她說：「冇呀！我會盡量去佢演唱會支持。（佢好大壓力？）始終係第一次個人演唱會，想將最好嘅畀人睇，如果係我都會咁！（度期出席撐佢？）盡量啦！」

至於陳曉華亦會同時兼拍《法證V》，角色會橫跨故事頭尾部分，現時趁開工不太頻密，她表示有空閒會在家種植物：「我有種葱同芫荽，種完自己食，依家每朝起身會望吓佢哋，好治愈。」