開騷反而唔開心？ Ian AK心痛歌迷撲飛 爭取網上直播

MIRROR成員Ian及Anson Kong（AK）昨日出席活動，大會向日前牛一的AK送上蛋糕，其後2人齊齊乘坐直升機，Ian自爆小時候的志願是做機師，所以十分期待，畏高的AK則有點緊張。有指MIRROR全員明年7月進軍紅館開騷，AK表示不知情：「我哋未收到正式通知。（開10場？）唔知係咪真，經理人花姐話會再話畀我哋聽。」

此外，2人將偕另外4位成員姜濤、Anson Lo、Edan及Jer於12月在會展開騷，但有指Fans要消費滿「癲價」100萬元才能換飛及入後台影相，AK說：「我哋唔知換分嘅價錢係點，都有聽Fans講咁樣仲難過買飛，我哋了解緊，睇吓可唔可以易啲買飛。」Ian亦坦言：「每次有騷都擔心Fans買唔買到飛，或者要買黃牛，都幾唔開心，開騷都係想報答Fans，所以希望多啲朋友睇到，好似我之前同馮允謙個騷有網上直播，可以緩解情況，大家入唔到場都可以網上支持。」AK亦有向公司反映，希望安排網上直播。

日前舉行的ViuTV節目巡禮公布，Ian將與姜濤拍攝以籃球為主題的劇集《季前賽》，Ian說：「我成日約姜濤打籃球，但都約唔成，今次終於可以一齊打，都有啲擔心如果到時開拍嘅話，可能我哋太興奮，淨係掛住打波！」而AK明年初亦會與另外兩位隊友拍劇，而他主理的節目《Have A Sweet Gym》將於11月播出。

另外，MIRROR近日「登陸」，Ian與姜濤扮「開房」及姜濤錫Edan面珠的短片，被上載至內地短視頻網站，大受歡迎。