絲絲講場：投委會請黃德斌教投資

投資陷阱多籮籮，散戶一個唔小心就會「中招」。為鼓勵大眾養成良好投資態度，投資者及理財教育委員會（下稱投委會）邀請藝人黃德斌化身精明投資便利店店長，為顧客指點迷津，教導「防踩氹」秘技。

今次宣傳片共有3集，當中唔少得近年出事率極高嘅「社交媒體」。片中沉迷投資討論區嘅上班族見到網上「跟到風！賺得輕鬆」、「我都掃咗，執咗幾萬」等言論，即時「心心眼」，德斌店長立即提醒，早排某些海外市場嘅股票受投資討論區影響，股價大幅波動，「隨便跟風，好大風險」，呼籲唔好隨便跟投資討論區嘅意見做決定。

勿輕信貼士留意風險

德斌店長拍攝完仲自爆，年輕時曾聽所謂消息貼士，跟風買入股票，開頭係賺到啲錢，但「貪字得個貧」，最終倒蝕5位數字。佢自此唔再輕信市場消息，連早前被加入俗稱「微信女」投資群組，都即刻退出，仲話「有人會在群組分享投資貼士，或直接講冧巴叫人投資，但世界哪會有免費午餐，背後很可能都是投資騙局」。

另外兩集關於借錢投資及虛擬貨幣，德斌提醒借錢投資倍大回報之餘，亦會倍大風險。同時問炒賣虛擬貨幣嘅年輕人，對新興金融產品有幾多認識，虛擬貨幣價格經常大起大跌，「咁刺激，你頂唔頂得順？」

話時話，德斌店長幾受資產管理機構歡迎。國際投資公司富達亦搵佢拍亞洲環境、社會及管治（ESG）小劇場。投資回報增長幾多絲絲唔知，但估計佢「荷包」增長幾可觀。

爆料熱線：

(852) 3600 3600

傳真：

(852) 3600 8800

SMS：

(852) 6500 6500

電郵：

網上爆料：

MMS：